Di jonk an al Oochener Studenten hu mat dem “Oochener Student”, ee veräinseegent Lidd, wourop si ausgesprachen houfrig sinn, well dat huet nit all Club. Och Joerzengten no séngem Entstoën fillen sech d’Leit nach vum Text ugesprach. Wuel well sou vill der sech an di beschriwwe Situation kënnen afillen, sief et dass si selwer eng sollech Situation bei sech gesinn oder gefaart hu kommen, sief et dass si een kennen deem et esou gaangen ass.

Zum Auteur

Geschriwen, also gedicht guff d’Lidd vum Marcel Belche alias Bab. Ganz eleng, den 21. Mee 1992 Moies op der Toilette. Just bei der letzter Strophe huet den Julchen, vulgo Jules Theis, him e bessi gehollef, waat een leider och mierkt *g*.

D’Lidd guff am WS 1992/93 an der Veräinszeitung Um Karel fir d’éischte Kéier publizéiert.

De Bab huet vun 1989 bis 1993 zu Oochen Maschinebau studéiert, ier him bal dat nämlicht geschidd ass, wéi dem Held a sengem Lidd: Hien huet säi Studium zu Oochen oofgebrach, an huet op Liek gewiesselt, wou hien “Educateur gradué” guff.

Den excellente Musikant ass, onses Wëssens no, och ëmmer nach wéi deemols aktiv bei den Zolver Knappbléiser1 derbäi.

Erläuterungen

Gesongen get d’Lidd op d’Weis "Mariechen war ein Frauenzimmer. Verbreet ass och d’Fassung “Sabinchen war ein Frauenzimmer“, sou ze fannen z.B. am volksliederarchiv2

Genau wéi d’Original ass och dest eng Moritot, een Bänkelgesang mat moralischer Intentioun: De Jong huet nit gefollescht, war ze kéng, a get mat engem tragischem Enn (vum Studium a Mëssuechtung duerch d’Famill) bestrooft.

D’Iwwerschrëften zum folgenden Text, sinn nit original, mee aus didaktische Grënn vum Webmaster3 agefügt; si gi nit matgesongen.

Den Text vum “Oochener Student”

1. Strophe: op der Foire de l’étudiant.

   Ee Jong, dee wollt emol studéieren,
   dee froot sech, waat machen ech elo
   wéi hien sech do wollt informéieren
   woor och een vun Oochen do
   dee soot, et geet näicht iwer Oochen
   an d`Uni daat as déi bescht
   dee Jong deen huet sech daat unhéieren
   a soot sech, daat do kléngt net schlecht!

2. Strophe: d’Aschreiwung

   Kuerz drop, huet hien sech ageschriwen
   op der RWTH
   de Papp, den duecht, mäin Jong as duerchdriwen
   daat do, daat geet an d`A
   de Jong de soot, guer näicht!
   Schliesslech sin ech domm
   An ausserdem hun ech méng Première
   a sin e seriöse Jong

3. Strophe: Gudd Virsätz

   D`Semester daat huet ugefaangen
   an hien wor och der bäi
   hien as an all Vierliesung gaangen
   an sutz an der éischter Rei
   daat do daat sin einfach Saachen
   daat as jo alles kloer
   Ech mengen, ech werd mäin Ingénieur maachen
   a manner wéi fenef Joer

4. Strophe: den ale Kollesch

   Manm Äifer wor et schnell gedoen
   et woren emol kéng véierzéng Deeg
   wéi hien do an säi Cour wollt goen4
   do trefft hien een aale Kolleg
   “Du bass och hei zu Oochen ?
   Ma daat as eng fei Saach”
   Den Frend deen soot, “daat do as fantastisch,
   lo get mol eng Rull gemaat! “

5. Strophe: op den Dësch, op den Dësch

   Deen éischten Bistrot, wou si du gungen,
   do wor et wierklech uereg
   all déi, die op den Descher stungen
   déi koumen vun Letzebuerg
   jet Humpen huet hien konsomméiert
   hien haat eng deckeg un
   den Dag drop, guff näicht méi geléiert
   well de Jong war net gudd drun

6. Strophe: daat éischt Semester

   Die nächst Deeg, Wochen a Méint
   do gung et net anscht erof
   an huet et him zevill gedréint
   dann huet hien am Bistrot geschloof
   hien heut gesoff a gefeiert
   hien wor den Béierheld
   a wéi die éischt Klausuren kummen
   huet hien se oofgemeld!

7. Strophe: di nächst Semester

   Di nächst Semester guff nach emmer,
   alles drop gemaach
   et gouf souguer, nach vill schlemmer
   an d`Liewer guff méi haard
   a schliesslech no etlech Semester
   koum daat, waat hien net wollt
   dun as hien am drette Semester
   koum daat waat hien net wollt
   dun as hien am drette Semester
   ratzekal duerchgetrollt!

8. Strophe: d’Moral vun der Geschicht

   Säi Studium as elo gschas
   kee Frang mé hannen a vier
   a wéi hien zréck op Letzebuerg komm as
   stungen d`Valissen virun der Dir
   dofir Leit loost Iech beléieren
   a maacht kéng sou eng Gaffen
   drenkt Dir gären eng etlech Béieren
   da gidd dach nemen schaffen!

1. http://harmoniedesoleuvre.lu/ [↩]
2. http://www.volksliederarchiv.de/text659.html [↩]
3. Daniel Erpelding. [↩]
4. De BAB selwer huet di Zeil am Karel vum WS 1992/93 als “Wéi hien nämlech a sei Cours wollt goen” uginn. Dat zweesilbischt Wuert “nämlich” séngt sech awer nit sou gutt, nit all Chouer kritt dat hinn. Dowéinst huet et sech agebiergert, hei just “do” ze sangen. [↩]